ღვინის ყველა მოყვარულისთვის ნაცნობი და სასიამოვნო ხმა, რომელსაც ბოთლი გახსნის მომენტში, კორპის საცობის ამოძრობისას გამოსცემს, მალე შეიძლება ისტორიის კუთვნილება გახდეს. ფრანგი მეღვინეები კორპის საცობის ნაცვლად წარმოებაში სულ უფრო ხშირად იყენებენ ხრახნიან თავსახურებს. ასეთი პრაქტიკა უკვე კარგა ხანია გავრცელებული და დამკვიდრებულია ახალი სამყაროს ქვეყნების – ახალი ზელანდიისა და ავსტრალიის ღვინის წარმოებაში. ახალი ზელანდიის ღვინოების 90% და ავსტრალიის ღვინოების 60% სწორედ ასეთი ტექნოლოგიით იხუფება, მაგრამ მათგან განსხვავებით, ფრანგები მტკივნეულად განიცდიან ტრადიციული კორპის საცობის სხვა სახუფით ჩანაცვლების ტენდენციას. ექსპერტთა თქმით, ფრანგული ღვინის ორი უდიდესი მწარმოებელი - Domaine de la Romanеe-Conti ბურგუნდიიდან და სახელოვანი ბორდოები, რომელთა ღვინოებიც ათეულ ათასობით დოლარი ღირს, ამ ეტაპზე უკვე აქტიურად განიხილავს დახუფვის ახალ ტექნოლოგიაზე გადასვლის შესაძლებლობებს, თუმცა, ამ თემაზე კომენტარის გაკეთებისგან ისინი ჯერჯერობით თავს იკავებენ.