მარკეტინგული კვლევების სააგენტო Wine Intelligence-მა ღვინის მოყვარულ ბრიტანელთა მორიგი გამოკითხვის შედეგები გამოაქვეყნა. სამი წლის წინ ჩატარებულ იმავე ტიპის გამოკითხვის შედეგებთან შედარებამ ცხადყო, რომ თეთრი ღვინის მოყვარულ ბრიტანელთა პროცენტული მაჩვენებელი 45%-დან 37%-მდე შემცირდა. სამაგიეროდ, იმატა ვარდისფერი ღვინის დამფასებელთა რაოდენობამ - თუ სამი წლის წინ ბრიტანელთა 10% ანიჭებდა უპირატესობას ვარდისფერ ღვინოს, ახლა ეს მაჩვენებელი უკვე 18%-ს აღწევს. ცვლილებები შეინიშნება აგრეთვე ღვინის წარმომავლობისა და სახეობებისადმი ბრიტანელთა დამოკიდებულების საკითხშიც. თუ სამი წლის წინ გამოკითხულთა 70% თვეში ერთხელ მაინც სინჯავდა ავსტრალიურ ღვინოს, ახლა 65% იქცევა ასე. ფრანგულ ღვინოს გამოკითხულთა 53% მიირთმევს, მაშინ, როცა სამი წლის წინ ეს მაჩვენებელი 66%-ს შეადგენდა. სამაგიეროდ, აშკარად მატულობს სამხრეთაფრიკული (50% ნაცვლად 46%-სა) და ახალზელანდიური (27% ნაცვლად 22%-სა) ღვინის დამფასებელთა რიცხვი.