ალკოჰოლის უდიდესმა მწარმოებელმა ისლანდიურმა კომპანია Reyka Vodka-მ გადაწყვიტა რეკლამისთვის გამოეყენებინა მათ ქვეყანაში მომხდარი ვულკანის ამოფრქვევა, რომლის გამოც უამრავი ავიარეისი გადაიდო. კომპანიამ გამოაცხადა კონკურსი ყველაზე დრამატული ისტორიისთვის, რომელიც ევროპის ამ სატრანსპორტო კოლაფსს უკავშირდება. კონკურსის გამარჯვებული ისლანდიაში მოგზაურობით დაჯილდოვდება. კომპანიის ვებგვერდზე უკვე გამოჩნდა ჩაშლილი თაფლობის თვის, ვერშემდგარი საქმიანი შეხვედრისა თუ ჩაშხამებული შვებულების ამსახველი გულისამაჩუყებელი ისტორიები. გამარჯვებული, როგორც აცხადებენ, მაისში გამოვლინდება, როცა ვულკანის ამოფრქვევისგან გაჩენილი მტვერი საბოლოოდ გაიფანტება. არყის ისლანდიელი მწარმოებლები ამბობენ, რომ ვულკანზე განაწყენება არ ღირს – ეს ხომ ბუნებრივი მოვლენაა, რომელიც ხელს უწყობს კუნძულის ფორმირებას და ამ მოვლენას სარეკლამო სლოგანადაც იყენებენ - ,,ბოლო დღეების განმავლობაში თქვენ დარწმუნდით, თუ რაოდენ უნიკალურია ისლანდიის ბუნება. გარწმუნებთ, ჩვენი არაყი არანაკლებ უნიკალურია.”
© ღვინის კლუბი/“Weekend“