ისრაელელი მეწარმეები კმაყოფილებით აღნიშნავენ, რომ გასულ წელს მაცის ექსპორტი 30%-ით გაიზარდა. 2009 წელს ისრაელმა 45,6 მილიონი დოლარის ღირებულების მაცის ექსპორტი მოახდინა, რაც 2008 წლის 12 მილიონიან ექსპორტს ბევრად აღემატება. როგორც ისრაელის ექსპორტის ინსტიტუტი იტყობინება, მაცის ძირითადი მომხმარებლები ევროპისა და ჩრდილოეთ ამერიკის ებრაული სათვისტომოები არიან. ექსპორტირებული მაცის დიდი წილი - 64% ჩრდილოეთ ამერიკაში იყიდება, შემდეგ მოდიან იტალია, საფრანგეთი, ბრიტანეთი, სამხრეთ ამერიკა და კანადა. ინსტიტუტის წარმომადგენელები ამ ფაქტს იმით ხსნიან, რომ მთელ მსოფლიოში უფრო და უფრო მეტი ყურადღება ექცევა ჯანსაღ პროდუქციას და მაცაზე, იქნება ეს ხორბლის, ჭვავის, თაფლიანი თუ შოკოლადიანი, მოთხოვნილებაც დღითიდღე იზრდება.