ვაზი, საიდანაც ეს ბიოღვინოა დაწურული, უკვე საკმაოდ ასაკოვანია და მისგან ღვინოც დარბაისლური დგება. იაგო ბიტარიშვილის არაერთი მოსავლის ჩინურის ღვინო დამილევია, თუმცა ურთულესი 2007 წელი მაინც ერთ-ერთი საუკეთესო აღმოჩნდა. ღვინოს ძალიან მკრთალი ჩალისფერი აქვს, ეფექტური პირველი სურნელებით ხასიათდება, სადაც ველური პიტნის ტონებს პანტა მსხლის ძლიერი არომატი ერწყმის. გემრიელი სიხისტე და მჟავიანობა, სხვა ფაქტორებთან ერთად, კარგად შესანახ ღვინოდ აქცევს მას. დღესდღეობით ეს ალბათ ქართლური ღვინის ეტალონად უნდა მივიჩნიოთ. ძალიან ხანგრძლივი დაგემოვნების ღვინოა, რომელიც ყოველ ყლუპზე ახლიდან აღმოგაჩენინებს თავს. საუკეთესო მისაყოლებელი იქნება ხამანწკებთან, ევროპულ ყველებთან, შამფურზე შემწვარ თევზთან და ბოსტნეულთან.
მ.ხ. © vinoge.com