პოლონეთის ბაზარზე ქართული ღვინის საექსპორტო პოტენციალის გაზრდის მიზნით, ღვინის ეროვნული სააგენტოს ფინანსური მხარდაჭერითა და კონტრაქტორი მარკეტინგული კომპანიის, „People PR“-ის ორგანიზებით, საქართველოში პოლონელი ღვინის პროფესიონალების საინფორმაციო ტური ჩატარდა.
პოლონეთი ქართული ღვინის ერთ-ერთ ყველაზე სტაბილურ და სტრატეგიულ ბაზარს წარმოადგენს, რომელიც წლებია საექსპორტო ქვეყნების ტოპ-ხუთეულში იკავებს ადგილს. აღსანიშნავია, რომ ქართული პროდუქცია იქ თანაბრად ხელმისაწვდომია როგორც HoReCa (სასტუმროები, რესტორნები, კაფეები) სექტორში, ისე მსხვილ ქსელურ მარკეტებსა და სპეციალიზებულ ღვინის მაღაზიებში.
სპეციალურად ამ მიზნით ორგანიზებულ 8-კაციან დელეგაციაში შედიოდნენ:
• კომერციული სექტორის (იმპორტიორები და ბაიერები) წარმომადგენლები;
• დარგობრივი მედიის ჟურნალისტები;
• მარკეტინგული სააგენტო „People PR“-ის ექსპერტები.
სტუმრებმა დეტალურად მოინახულეს ქართლისა და კახეთის რეგიონები, სადაც უშუალოდ გაეცნენ ქართული ღვინის დაყენების როგორც კლასიკურ (ევროპულ), ისე ტრადიციულ (ქვევრის) მეთოდებს და ადგილზე დააგემოვნეს სხვადასხვა სახეობის ღვინოები.
ვიზიტის ფარგლებში, დედაქალაქში სპეციალური სემინარი მოეწყო. შეხვედრაზე ქართველმა მწარმოებლებმა პოლონელი კოლეგებისგან მიიღეს პრაქტიკული რეკომენდაციები და რჩევები, თუ როგორ უნდა მოხდეს პოლონეთის ბაზარზე ღვინის ეფექტური შეტანა, პოზიციონირება და რეალიზაციის მაჩვენებლების გაზრდა.
ცნობადობის მაქსიმალური გაზრდისთვის, ღვინის ეროვნული სააგენტო „People PR“-თან მუშაობას მიმდინარე წელსაც აქტიურად აგრძელებს.
© ღვინის კლუბი/vinoge.com