ფოტო: კევინ დეი
კევინ დეის ეს ფოტო 2026 წლის World Food Photography Awards-ის კონკურსის ერთ-ერთი გამორჩეული ნამუშევარია. კადრი იტალიაში, ტოსკანის რეგიონში მდებარე უძველეს და პრესტიჟულ მამულში - Tenuta di Capezzana-შია გადაღებული. ეს მეურნეობა ღვინოს ჯერ კიდევ ახალი წელთაღრიცხვით 804 წლიდან აწარმოებს.
ფოტოზე ასახულია უშუალოდ ყურძნის ბუნებრივი შრობის პროცესი, რასაც იტალიურად appassimento-ს უწოდებენ. სპეციალურად მოწყობილ სხვენში, ლერწმისა და ხის მრავალდონიან ჭილობებზე, თეთრი ყურძნის მტევნები რამდენიმე თვის განმავლობაში ინახება. ამ პერიოდში ყურძენი კარგავს წყალს და ჩამიჩდება, რის შედეგადაც მასში არსებული შაქარი და არომატული ნივთიერებები მაქსიმალურად კონცენტრირდება. სწორედ ასეთი, ნახევრად გამომშრალი ყურძნისგან იწურება უნიკალური ტოსკანური ღვინო Vin Santo.
ნამუშევარი წარდგენილი იყო ნომინაციაში „პროდუქტი“ (Produce). ეს კატეგორია ფოკუსირდება თავად ღვინოზე, ყურძენზე, წარმოების პროცესსა და ყველაფერ იმაზე, რაც უშუალოდ პროდუქტის შექმნას უკავშირდება. ფოტოს პირველი ადგილი არ აუღია (ამ კატეგორიაში გაიმარჯვა ლუკ კარვერის ფოტომ საქართველოდან, რომელიც ქვევრის შიგნიდან არის გადაღებული), თუმცა კევინ დეის ნამუშევარმა უდიდესი აღიარება მოიპოვა - ის შეირჩა საუკეთესო 36 ფინალისტს შორის საერთო ჯამში წარდგენილი ათასობით ფოტოდან.
ფოტოს ავტორი, კევინ დეი, ცნობილი ამერიკელი ფოტოჟურნალისტი, ღვინის მწერალი და ექსპერტია, რომელიც სპეციალიზებულია იტალიის, საფრანგეთისა და ესპანეთის ვენახებისა და მეღვინეობის კულტურის დოკუმენტირებაზე.
ეს კადრი, როგორც კონკურსის ფინალისტი, ლონდონის The Mall Galleries-ში გამართულ ოფიციალურ გამოფენაზეც იყო წარმოდგენილი.
© ღვინის კლუბი/vinoge.com