საქართველო მალე მსოფლიოს ერთ-ერთ ყველაზე პოპულარულ სტრიმინგ პლატფორმაზე, Netflix-ზე გამოჩნდება. ტურიზმის ეროვნული ადმინისტრაციის მარკეტინგული კამპანიის ფარგლებში, საერთაშორისო პროექტის გადაღებები საქართველოში გაიმართა, რომლის ერთ-ერთი მთავარი ეპიზოდი მთლიანად ჩვენს ქვეყანას დაეთმობა.
პროექტის წამყვანი ჰოლივუდის ცნობილი მსახიობი შეილინ ვუდლია, რომელსაც მაყურებელი კარგად იცნობს პოპულარული სერიალიდან Big Little Lies და ფილმებიდან Divergent, The Fault in Our Stars და სხვა წარმატებული ნამუშევრებიდან. მსახიობმა გადამღებ ჯგუფთან ერთად საქართველოს სხვადასხვა რეგიონი მოინახულა და ქვეყნის მრავალფეროვნება საკუთარი თვალით აღმოაჩინა.
გადაღებები თბილისის შემდეგ აჭარაში, სამეგრელოში, იმერეთში, სამცხე-ჯავახეთსა და მცხეთა-მთიანეთში გაგრძელდა. ვიზიტის განმავლობაში შეილინ ვუდლი ადგილობრივ კულტურას, ტრადიციებს, კულინარიულ მემკვიდრეობასა და უნიკალურ ბუნებას გაეცნო. თითოეულ რეგიონში განსაკუთრებული ყურადღება გამახვილდა იმ გამოცდილებაზე, რომელიც საქართველოს მსოფლიოს სხვა ტურისტული მიმართულებებისგან გამოარჩევს.
საერთაშორისო შოუს ერთ-ერთი მთავარი ეპიზოდი სრულად საქართველოს დაეთმობა. მაყურებელი იხილავს ქვეყნის გამორჩეულ ტურისტულ ადგილებს, გასტრონომიულ მრავალფეროვნებას, ისტორიულ მემკვიდრეობასა და ავთენტურ კულტურას, რაც საქართველოს მილიონობით მაყურებლის წინაშე სრულიად ახალი კუთხით წარადგენს.
დოკუმენტური ფილმი Netflix-ზე განთავსდება, რაც საქართველოსთვის კიდევ ერთი მნიშვნელოვანი შესაძლებლობაა საერთაშორისო ცნობადობის გასაზრდელად.
© ღვინის კლუბი/vinoge.com