ღვინის ეროვნული სააგენტოს ფინანსური და ორგანიზაციული მხარდაჭერით, გერმანიის ქალაქ დუსელდორფი-ში, მსოფლიოში ერთ-ერთ ყველაზე მასშტაბურ ღვინისა და ალკოჰოლიანი სასმელების გამოფენაში ProWein Dusseldorf ქართული ღვინის მწარმოებელი 26 კომპანია მონაწილეობდა. აღნიშნული ღონისძიება წარმოადგენს საერთაშორისო პლატფორმას, სადაც თავს იყრის ღვინის ინდუსტრიის პროფესიონალები, იმპორტიორები, დისტრიბუტორები და მედიის წარმომადგენლები, რაც განსაკუთრებულ შესაძლებლობას ქმნის ქართული ღვინის პოპულარიზაციისთვის.
სამდღიანი გამოფენის ფარგლებში, ღვინის ეროვნული სააგენტოს კონტრაქტორი მარკეტინგული კომპანიის ff.k Public Relations ორგანიზებით გაიმართა ქართული ღვინის პროფესიული პრეზენტაცია-დეგუსტაციები. ღონისძიებებს უძღვებოდნენ საერთაშორისო ღვინის სფეროს აღიარებული ექსპერტები: ინგე მაინცერი, რობერტ ჯოზეფი, ასევე ღვინის მაგისტრები კონსტანტინ ბაუმი და იანეკ შუმანი. დეგუსტაციებზე განსაკუთრებული ყურადღება დაეთმო ქვევრის ღვინოებს, რომლებიც ქართული მეღვინეობის უნიკალურობასა და მრავალსაუკუნოვან ტრადიციებს უსვამს ხაზს. პარალელურად, დამთვალიერებლებს საშუალება ჰქონდათ გასცნობოდნენ ქართულ სამზარეულოსა და გასტრონომიას, რაც კიდევ უფრო აძლიერებდა ქვეყნის კულტურულ იმიჯს.
აღსანიშნავია, რომ საქართველო გამოფენაში „ProWein Dusseldorf“ უკვე 26-ედ მონაწილეობდა, რაც ქვეყნის თანმიმდევრულ და სტრატეგიულ მიდგომაზე მიუთითებს. სამი დღის განმავლობაში, ათასობით სტუმარს, მათ შორის ღვინის პროფესიონალებსა და კომერციული სექტორის წარმომადგენლებს, შესაძლებლობა მიეცათ დაეგემოვნებინათ ქართული ღვინო, რაც პირდაპირ გავლენას ახდენს გაყიდვების ზრდასა და ახალი ბაზრების ათვისებაზე.
წლევანდელ გამოფენაში მსოფლიოს 50 ქვეყნის დაახლოებით 2400 ღვინის კომპანია მონაწილეობდა, რაც კიდევ ერთხელ ადასტურებს ღონისძიების მასშტაბურობასა და მნიშვნელობას. განსაკუთრებულად მნიშვნელოვანია ის ფაქტიც, რომ გერმანია წარმოადგენს ევროპაში ერთ-ერთ ყველაზე დიდ იმპორტიორსა და ღვინის მომხმარებელ ქვეყანას. შესაბამისად, ასეთ ბაზარზე ქართული ღვინის პოზიციონირება და ცნობადობის გაზრდა სტრატეგიულად უმნიშვნელოვანესია.
© ღვინის კლუბი/vinoge.com