2023 წლის ღვინის ფოტოგრაფიის პრესტიჟულ კონკურსში, კატეგორიაში „პროდუქტი“, გამარჯვება ბრიტანელმა ფოტოგრაფმა ედრიან ჩიტიმ მოიპოვა თავისი გამორჩეული ნამუშევრით — „თვალი“ (The Eye).
პირველივე შეხედვაზე აშკარა ხდება, რომ ეს ფოტო სცდება დოკუმენტური გამოსახულების ფარგლებს და ვიზუალურ მეტაფორად გარდაიქმნება. ჩიტის კამერის ობიექტივში დაფიქსირებული სცენა — შარდონეს ნალექის მრგვალი ორნამენტი უჟანგავი ფოლადის რეზერვუარის ფსკერზე — წარმოუდგენელი სიზუსტითა და სიღრმით ასახავს ბუნებისა და ტექნოლოგიის ერთობლივ ქმედებას.
სურათის ცენტრში, მუქ ოქროსფერ ტონალობაში, ნალექები ქმნიან თვალისმომჭრელ სპირალს, რომელიც თვალის გუგას მოგვაგონებს. რკალის ფორმის ხაზები ბუნებრივად ეხმიანება ადამიანის ხედვით სისტემას.
„ისეთი შთაბეჭდილება დამრჩა, თითქოს ღვინო გიყურებდა, ეს იყო სწრაფად წარმავალი მეხსიერება — ბუნების ხელმოწერა დუღილის ბოლოს.“ — აღნიშნა ჩიტიმ თავის ფოტოზე საუბრისას.
„თვალი“ არა მხოლოდ ტექნიკური ოსტატობით, არამედ ინტერპრეტაციის სიღრმითაც გამოირჩევა. ის გვახსენებს, რომ ღვინის შექმნის პროცესი მხოლოდ ქიმიური რეაქცია არ არის, ეს არის ცოცხალი მატერიის გარდაქმნა, რომლის თითოეულ ეტაპსაც თავისი ესთეტიკა, ხასიათი და მეხსიერება აქვს.
© ღვინის კლუბი/vinoge.com