ბრიტანულ ჟურნალ Decanter-ის 2025 წლის აგვისტოს ნომერში დაიბეჭდა ენდრიუ ჯეფორდის სტატია, რომელშიც ღვინის განვითარების დისკურსს მიმოიხილავს.
წელს ჟურნალი 50 წლის იუბილეს აღნიშნავს, ხოლო მისი ერთ-ერთი წამყვანი ავტორი და ღვინის სამყაროს ცნობილი მკვლევარი ენდრიუ ჯეფორდი ამ მნიშვნელოვან თარიღს ნოსტალგიურად და ანალიტიკურად აფასებს. იგი იხსენებს, როგორ დაიწყო ღვინის სამყაროში თავისი გზა სწორედ Decanter-ის ფურცლებზე, როდესაც 1980-იანებში პირველი წერილი გამოაქვეყნა.
ჯეფორდი აღწერს, რომ 1975 წელს, როდესაც კოლინ პარნელმა და ტონი ლორდმა ჟურნალი დააარსეს, ღვინის ინდუსტრიის მდგომარეობა კრიზისში იყო. ბორდოში ფასთა სისტემა ჩამოშლილი იყო, ვენახებში პესტიციდებსა და ჰერბიციდებს მძლავრად იყენებდნენ, ღვინის ხარისხი კი სერიოზული კითხვის ნიშნის ქვეშ იდგა. აღმოსავლეთ ევროპა და საქართველო საბჭოთა კავშირის „პროდუქტივიზმის“ ჩრდილში იყვნენ, ხოლო ესპანეთი, პორტუგალია და საბერძნეთი ან ახლახან მოპოვებულ თავისუფლებას ზეიმობდნენ, ან ჯერ კიდევ დიქტატურის ქვეშ ცხოვრობდნენ. ახალი სამყაროს ღვინის რეგიონები — ჩილე, ახალი ზელანდია, ორეგონი, ვაშინგტონი — მხოლოდ პირველ ნაბიჯებს დგამდნენ, ჩინეთის შესახებ კი საუბარიც არ იყო.
თუმცა სწორედ აქედან დაიწყო გარდატეხა. პოლიტიკური ცვლილებები, საბჭოთა კავშირის დაშლა, დემოკრატიზაცია და გლობალიზაცია გახდა ის საფუძველი, რომელმაც ღვინის ინდუსტრია მთლიანად გარდაქმნა. ამას დაემატა აგრარული რეფორმები და ხარისხზე ორიენტირებული მუშაობა, რამაც წარმოშვა ახალი კულტურა — ღვინის მოხმარების გლობალური ტალღა. ამ პროცესში Decanter-მაც თავისი მოკრძალებული, მაგრამ მნიშვნელოვანი წვლილი შეიტანა.
ჯეფორდი განსაკუთრებულ ყურადღებას ამახვილებს კლიმატის ცვლილებაზე, როგორც უკანასკნელი 50 წლის ერთ-ერთ უმთავრეს ფაქტორზე. გლობალურმა დათბობამ ბევრი რეგიონი „გოლდის ზონაში“ გადაიყვანა: ისეთი ადგილები, სადაც ადრე მაღალი ხარისხის ღვინო წარმოუდგენელი იყო, დღეს მსოფლიო რუკაზე აღიარებული სახელებია — ინგლისი, ონტარიო, ცენტრალური ოტაგო, ადელაიდის მთები, გუალტალარი.
თუმცა, ავტორის თქმით, მომდევნო 50 წელი დამოკიდებულია ჩვენზე. თუ საზოგადოებები პოპულიზმის, სავაჭრო ბარიერებისა და კლიმატის კრიზისის იგნორირების გზას აირჩევენ, ღვინის სამყაროს აყვავება შესაძლოა საფრთხის წინაშე დადგეს.
სტატიის ბოლოს ჯეფორდი საკუთარ „თვის არჩევანს“ უზიარებს მკითხველს: ლანზაროტეს El Grifo-ს 2023 წლის Lías Malvasía Volcánica. მისი თქმით, ეს ღვინო არამხოლოდ ახალი და დაუვიწყარი გემოთი გამოირჩევა, არამედ იმ უნიკალურ ვენახებშიც იზრდება, რომლებიც თავადვეა ისტორიის ნაწილი.
© ღვინის კლუბი/vinoge.com