მთელს მსოფლიოში ღვინის მოყვარულთა უმეტესობამ იცის, რომ საქართველო ღვინოს 8000 წელზე მეტია აწარმოებს და "ღვინის სამშობლოდ" ითვლება. ქვევრისა და წიპწების აღმოჩენის გარდა, ქარვისფერი ღვინის უნიკალურობაზეც ბევრს საუბრობენ. ახლა სტატიას Forbes აქვეყნებს. კრისტი კენტერბერი, Wines of Georgia-ს ამჟამინდელი ელჩი აცხადებს, რომ საქართველოში წარმოებული ღვინის მხოლოდ 5% ვრგდება ქვევრში.
სტატიაში Mukado Wines-ის მთავარი მეღვინის, ლადო უზუნაშვილის კომენტარსაც ვკითხულობთ. ის ქვევრში 6 თვის განავლობაში აყოვნებს ღვინოს: "ქარვისფერ ღვინოებს დაახლოებით 6 თვის მანძილზე ვავარგებთ ქვევრში, თუმცა წითლისთვის კი ვარჩევ 30- 45 დღემდე მაცერაციას, რადგან წითელ ყურძენს უფრო მეტი ტანინები აქვს."
უზუნაშვილი ქვევრის შესახებაც საუბრობს და აღნიშნავს, რომ რეგიონებიდან გამომდინარე მის დასამზადებლად სხვადასხვა თიხას იყენებენ, ქვევრის ზომაც სხვადასხვაა: "უფრო გრილ რეგიონებში, როგორიცაა რაჭა, როგორც წესი დურდოზე უფრო ნაკლებ ხანს აჩერებენ ღვინოს ვიდრე, მაგალითად, კახეთში." - აღნიშნავს მეღვინე.
ავტორი ქარვისფერი ღვინის არომატებზეც წერს. ამბობს, რომ მათი უმეტესობა მშრალია და გამოირჩევა ოქროსფერი ვაშლის, თხილის, ფორთოხლის ცედრისა და მწვანილების სურნელოვანი არომატებით. ზოგიერთს შეიძლება ჟანგვისკენ იყოს წასული, თუმცა ესეც მათი უნიკალური ხასიათი ნაწილია. უზუნაშვილი საუბრობს იმაზეც, თუ რა განსხვავებაა სხვადასხვა რეგიონში დაყენებულ ქარვისფერ ღვინოებს შორის. აღნიშნავს, რომ ნიადაგის ტემპერატურასა და ქვევრის ზომაზე საკმაოდ ბევრია დამოკიდებული: "ქვევრში დაყენებული ქარვისფერი ღვინის მირთმევისას კი მნიშვნელოვანია, რომ ის მიირთვათ 55 - 65 F ტემპერატურაზე". ავტორი წერს კერძებთან შეხამებაზეც და ამბობს, რომ ასეთი სტილის ღვინო განსაკუთრებით უხდება ცხვრის, ცხიმიანი თევზის კერძებს, სტეიკსა და ყველს.
საქართველოში 1000-ზე მეტი ღვინის მწარმოებელია, ყოველწლიურად კი დაახლოებით 93 მლნ. ბოთლი ღვინო იწარმოება. უკვე 2019 წლისთვის საქართველოდან 340 ქვეყანაში გავიდა 328 მლნ დოლარის ღირებულების ღვინო, ეს რიცხვი კი ექსპორტთან ერთად ყოველ წელს უფრო და უფრო იზრდება. სტატიას სრულად შეგიძლიათ Forbes-ზე გაეცნოთ.
© ღვინის კლუბი/vinoge.com