ფოტო: ზურაბ თოფურიძე
ჟენევაში, გაერთიანებული ერების ორგანიზაციის ოფისის ეზოში ქართული ქვევრი განთავსდა. როგორც საქართველოს საგარეო საქმეთა სამინისტრო იუწყება, ეს ქვევრი საქართველოს მთავრობამ გაერთიანებული ერების ორგანიზაციას დაარსების 70 წლის იუბილესთან დაკავშირებით საჩუქრად გადასცა.
საზეიმო ცერემონიაზე სტუმრებს გაეროს გენერალურმა დირექტორმა, მიხაელ მიოლერმა და საქართველოს საგარეო საქმეთა მინისტრმა, მიხეილ ჯანელიძემ მიმართეს.
ქვევრის მიმდებარედ გაიხსნა მემორიალური დაფაც, რომელიც სტუმრებს გააცნობს ძეგლის წარმოშობის ისტორიას და მის კულტურულ ღირებულებას.
ღონისძიების ფარგლებში გაიმართა ქართული ღვინის დეგუსტაცია და მერაბ კოკოჩაშვილის ფილმის - „ღვინის გზა“ ჩვენება. ღონისძიებას ესწრებოდნენ გაერთიანებული ერების ორგანიზაციის, საქართველოს საგარეო საქმეთა სამინისტროს წარმომადგენლები, აგრეთვე, ლიტვის საგარეო საქმეთა მინისტრი - ლინას ლინკევიჩუსი და ყირგიზეთის ვიცე-პრემიერი.
© საქართველოს ღვინის კლუბი, ღვინის ეროვნული სააგენტო, ღვინის საინფორმაციო ცენტრი