ცნობილი ამერიკელი რეჟისორი, მწერალი, ღვინის ექსპერტი ჯონათან ნოსიტერი საქართველოში 6 ოქტომბერს ჩამოვიდა.
საქართველოში ვიზიტის პირველ დღეს ნოსიტერი ეწვია სოფლის მეურნეობის სამეცნიერო-კვლევით ცენტრს. ცენტრის თანამშრომლებმა მას წარუდგინეს ვაზისა და ხეხილის სანერგე მეურნეობა, სადაც ადგილობრივი ვაზის 440-მდე ჯიშია კონსერვირებული. ასევე, შესთავაზეს რამდენიმე დასახელების საკუთარი წარმოების საცდელი ღვინოები - კახური მცვივანი, თეთრი კაპისტონი და სხვ.
რეჟისორს საკუთარ მარანში უმასპინძლეს იაგო ბიტარიშვილმა და მარინა კურტანიძემ, სადაც ნოსიტერმა დააგემოვნა ტრადიციული მეთოდით დაყენებული ქვევრის ჩინური (იაგოს ღვინო) და ტრადიციული მეთოდითვე დაყენებული მწვანე (მანდილი).
საღამოს საქართველოს პარლამენტის ეროვნულ ბიბლიოთეკაში ჩატარდა საქართველოს ღვინის კლუბის მიერ ორგანიზებული შეხვედრა ჯონათან ნოსიტერთან, რომელსაც ესწრებოდნენ როგორც კლუბის წევრები, ასევე სტუმრები. შეხვედრაზე ნოსიტერმა ისაუბრა ნატურალური მეურნეობის მნიშვნელობისა და პერსპექტივების შესახებ მსოფლიოში და აუდიტორიას მოუთხრო იმ ფილმებზე მუშაობის ისტორიების შესახებ, რომელთა ჩვენება 7 ოქტომბერს გაიმართება საქართველოს ისტორიის მუზეუმსა და კინოთეატრ ამირანში.
© საქართველოს ღვინის კლუბი, ღვინის საინფორმაციო ცენტრი.