პირველადი მონაცემებით, ძლიერი სეტყვისა და ქარიშხალის შედეგად, ყვარლის რაიონში 165 ტონა "რქაწითელი" და 62 ტონა "საფერავის" ჯიშის ყურძენი განადგურდა. ფულადმა ზარალმა კი 201 ათასი ლარი შეადგინა.
სეტყვამ აგრეთვე მნიშვნელოვნად დააზარალა თელავისა და საგარეჯოს რაიონები, სადაც პირველადი მონაცემებით მოსავლის 60% განადგურდა.
წინასწარი ინფორმაციით, თელავში დაზარალებულია 852 ოჯახი. ფულადმა ზარალმა აქ 400 ათას ლარს გადააჭარბა. მოსავლის გარდა, სტიქიამ თელავში საცხოვრებელი სახლები დატბორა, დაანგრია საავტომობილო გზები და ხიდები, დაიხოცა შინაური ცხოველი და ფრინველი.
ზარალის ოდენობა დგინდება საგარეჯოს რაიონშიც.
როგორც რადიო "ჰერეთს" კახეთში პრეზიდენტის რწმუნებულის მოადგილემ, შოთა თარხნიშვილმა განუცხადა, ზარალის საბოლოოდ დადგენის შემდეგ, ხელისუფლება დაზარალებულებს ფულადი კომპენსაციით დაეხმარება.
რადიო "ჰერეთი"