ღვინის კიკლადური ჯიში – ასირტიკო – როგორც იქნა, გასცდა ხმელთაშუა ზღვისპირეთის ფარგლებს. ასირტიკოსგან დაყენებული ღვინის გასინჯვა ადრე ვულკანური წარმოშობის კუნძულ სანტორინის გარდა ძნელად თუ შეიძლებოდა სადმე, დღეს კი ყურძნის ეს ჯიში თითქმის მთელ საბერძნეთშია გაშენებული. 21-ე საუკუნეში ასირტიკოს ჯიშის ყურძნის რეპუტაცია მკვეთრად ამაღლდა და მისით შორეულ ავსტრალიაშიც დაინტერესდნენ. მწვანე კონტინენტზე, კლერის დაბლობზე, სადაც ცნობილი მარანი Jim Barry Wines მდებარეობს, ასირტიკო ნახევარ ჰექტარზე გააშენეს. მარანის მმართველის – პიტერ ბერის თქმით, ცოცხალი მჟავიანობით გამორჩეული ასირტიკო შესანიშნავად ეხამება ავსტრალიური სამზარეულოს კერძებს. ამ ჯიშის მშრალი ნიადაგისა და დაავადებებისადმი მდგრადობა მშვენიერ პერსპექტივას ქმნის მისი სამხრეთ ავსტრალიაში წარმატებული გაშენებისთვის. ამასთან, ეს დიდი გამოცდაც არის – ავსტრალიაში ხომ მსოფლიოში ყველაზე მკაცრად დგას სანიტარული კონტროლის საკითხი. ავსტრალიური ასირტიკო, სავარაუდოდ, ხუთი წლის შემდეგ ჩამოისხმება ბოთლებში.
© ღვინის კლუბი/Weekend