„როგორ გავაცნოთ ქართული ღვინო სტუმარს“

სალომე აფხაზიშვილი

„როგორ გავაცნოთ ქართული ღვინო სტუმარს“ – ასე ერქვა სემინარს, რომელიც ღვინის კლუბის ორგანიზებით ყვარელში, რესტორან „საფერავში“ ჩატარდა. სემინარი USAID-ის ეკონომიკური აღმავლობის პროგრამის დაფინანსებითა და მეღვინეობა „ხარებას“ მხარდაჭერით გაიმართა, რომელსაც  Wine & Spirit Education Trust-ის კურსდამთავრებულები, მალხაზ ხარბედია, ნატალია უტიაშვილი და ალექს ბადუაშვილი უძღვებოდნენ. სემინარის პროგრამა ამერიკელი ღვინის ექსპერტის, ჯესიკა ბელის მიერ იყო შემუშავებული და იგი ღვინის კლუბთან, ღვინის სკოლასთან, ქვევრის ფონდთან და სხვა ორგანიზაციებთან თანამშრომლობით შეიქმნა ორიოდე თვის წინ.

მიუხედავად იმისა, რომ კახეთში რთველი აქტიურ ფაზაში შედისდა მეღვინეები  ინტენსიურ რეჟიმში მუშაობენ, სემინარზე დასასწრებად მოსვლა რამდენიმე კომპანიის და ღვინის ტურიზმის წარმომადგენლებმა მაინც შეძლეს. თუმცა, ისიც უნდა აღინიშნოს, რომ ხშირ შემთხვევებში ამ სფეროში მომუშავე ადამიანები ასეთი შეხვედრებით არ ინტერესდებიან და მონაწილეობაზეც უარს აცხადებენ ხოლმე. მალხაზ ხარბედიამ თემის წარდგენამდე ხაზი სწორედ ამას გაუსვა:

[„მიუხედავად იმისა, რომ საქართველო ღვინის სამშობლოდ ითვლება, აქ ღვინის შესახებ ინფორმაცია ძალიან ცოტა ადამიანს აქვს. ხშირად ამგვარ ღონისძიებებზეც მიჭირს ხოლმე ადამიანების დაყოლიება“].

არადა, ქვეყანაში, რომელიც მეღვინეობის 8000 წლიან ისტორიას ითვლის და ამაყობს ღვინის სამშობლოს ტიტულით, ახალი ინფორმაცია და გამოცდილება, სწორედ ღვინისა და კულინარიის ტურიზმში დასაქმებულ ადამიანებს სჭირდებათ. ამისთვის მხოლოდ განახლებული რაიონული ცენტრები და გამართული ინფრასტრუქტურა არ კმარა.

სემინარის პირველი ნაწილი ქართული ღვინის ღირსებებზე საუბარს მიეძღვნა. მალხაზ ხარბედიამ ამ სფეროში მომუშავე ადამიანებისთვის უკვე ცნობილი ფაქტები დამატებითი ცნობებით შეავსო. დეგუსტაციამდე, მან ღვინის დაყენების ტრადიცულ და თანამედროვე  მეთოდოლოგიასა და საქართველოში არსებული მეღვინეობის მიკროზონებზეც ისაუბრა.

ისტორიული ექსკურსის შემდეგ, სემინარის ყველაზე ცოცხალი და ინტერაქტიული ნაწილი დაიწყო. მომხსნებლებმა და სტუმრებმა ღვინის დაყენების საკუთარ მეთოდებზე, დადუღების ვადებსა და პირობებზე და სხვა თემატურ საკითხებზე იმსჯელეს. თეორიულ ნაწილს ცხრა სახეობის ღვინის დაგემოვნება მოჰყვა.

მარმარილოსა და ტუფის ქვით ნაგებ ოვალურ დარბაზში, სპეციალურად მომზადებულ მაგიდებზე, თითოეული სტუმრის წინ ხუთი ერთნაირი სადეგუსტაციო ჭიქა იდგა, ასევე წყალი, საწერკალამი, სახელმძღვანელო და ჩანაწერებისთვის საჭირო ფურცლები.  ღვინოს თავად სემინარის წამყვანები ავსებდნენ ზედმიწვენითი სიზუსტითა და უჩვეულო ოსტატობით. თავიდან თეთრებით დავიწყეთ – რქაწითელი, მწვანე კახური, ცოლიკოური/ციცქა, წინანადალი, ქვევრის ტრადიციული კახური ღვინო, ასევე თანამედროვე ტიპის და ქვევრის საფერავი, მუკუზანი, ხვანჭკარა. ეს ერთმანეთისგან სრულიად განსხვავებული 9 ღვინო მეტ–ნაკლებად სრულ წარმოდგენას უქმნიდა მონაწილეებს თანამედროვე ქართული ღვინოზე და მის სახეობებრივ მრავალფეროვნებაზე.

საუბარი ღვინის ფერზე, გემოსა და სურნელის ინდივიდუალურ აღქმაზე ერთ საათზე მეტ ხანს გაგრძელდა – ახალი ხილი, სანელებლები, ბალახი, მიწა, ჩირი – ეს ის არომატები იყო, რაც სემინარის მონაწილეებს შორის გადალაპარაკებისას მესმოდა.  ერთადერთი, რისი გარჩევაც მარტივად შევძელი, მუხის კასრის მიერ დატოვებული მძაფრი გემოს ამოცნობა იყო. დამწყებ სომელიეებად თავი  განსაკუთრებით მაშინ წარმოვიდგინეთ, როდესაც პროექტორთან თელავის ღვინის მარნის წარმომადგენელი ნატალია უტიაშვილი გამოჩნდა. ნატალიამ კერძისა და ღვინის შეხამების მეთოდებსა და გამოცდილებაზე ისაუბრა.

„ღვინისა და კერძის შეხამება ძალიან რთული და საყურადღებო საქმეა, რასაც შემდეგ ემატება ფანტაზია. ჩვენ იმითაც გამოვირჩევით, რომ ერთ ღვინოსთან რამდენიმე კერძის შეხამების საშუალება გვაქვს. ეს არის რესურსი, რომელსაც გამოყენება სჭირდება“ – აღნიშნა ნატალიამ მოხსენების დასაწყისში.

ასე აღმოჩნდა სემინარის მონაწილეთა თეფშებზე ერთმანეთისგან სრულიად განსხვავებული სადეგუსტაციო კერძები – ღორის მწვადი, საქონლის მოხარშული ხორცი, შოკოლადი, კიტრი, პომიდორი, პური, ფხალი და ბადრიჯანი ნიგვზით. ნატალიას მითითებების თანახმად, ჩვენი მთავარი მიზანი იყო კერძისა და ღვინის გემო არ შეგველახა და მაღალმჟავინი კერძებისთვის, მაღალმჟავიანი სასმელი, ტკბილი კერძისთვის კი ტკბილი ღვინო შეგვეთავსებინა. სემინარი განსაკუთრებით საჭირო და საინტერესო სასტუმროს მენეჯერებისთვისა აღმოჩნდა, რომლებმაც მომხსნებელს კითხვებითაც მიმართეს და საკუთარი გამოცდილებაც გაუზიარეს.

გემრიელი კერძებისა და სასმელის დაგემოვნებაზე არანაკლებ სასიამოვნო სემინარის დასკვნითი ნაწილი აღმოჩნდა, როდესაც ალექს ბადუაშვილმა ვიზუალური და თეორიული პრეზენტაციით, დაგვარწმუნა იმაში, რომ ყველა ქართულ რესტორანსა და სასტუმროში მომსახურების მაღალ ხარისხს უნდა ვითხოვდეთ. ახალგაზრდა მენეჯერის პრეზენტირების კარგმა უნარმა, სტუმრების განსაკუთრებული მოწონება დაიმსახურა.

სასემინარო პროგრამა რამდენიმე საათს გაგრძელდა და სიგელების გადაცემით დასრულდა.

"ღვინის ხარისხის ზრდასთან ერთად, უნდა გაიზარდოს ხარისხიანი მომსახურების მოთხოვნაც“ – აღნიშნა მალხაზ ხარბედიამ და მონაწილეებს თბილისში დაგეგმილი მომდევნო სემინარების შესახებ ამცნო.

© რადიო "ცხელი შოკოლადი"