“ღვინოები მთელი მსოფლიოდან” - ასე ეწოდება ღვინოთა სერიას, რომელიც ბელგიურმა კომპანია Delhaize-მ გამოუშვა და გასაყიდად სუპერმარკეტების ქსელ “365”-ში გაიტანა. ახალი სერიის ერთგვარ სახედ იქცა საცობი - მისი გამოსახულება ეტიკეტებზეა დატანილი. თანაც დიზაინერების მცდელობით, ეტიკეტებზე გამოსახულ საცობს ადამიანის სახე აქვს მიცემული. თითოეულ მათგანს კონკრეტული ნაციონალური ელფერი მიანიჭეს. მაგალითად, იმ ბოთლის ეტიკეტზე, რომელიც ამერიკის კალიფორნიის შტატში იწარმოება, საცობს ინდიელთა ბელადის გამოსახულება ექნება, ხოლო ჩილეში ნაწარმოებ ღვინოს აღდგომის კუნძულის ცნობილი გიგანტური ქანდაკება დაამშვენებს. არგენტინული ღვინის ეტიკეტზე დატანილი გამოსახულება ძალიან ჰგავს დიეგო მარადონას. სერიაში მსოფლიოს საუკეთესო ღვინის მწარმოებელი ქვეყნები მოხვდებიან: ავსტრალია, ჩილე, ამერიკის შეერთებული შტატები, არგენტინა, იტალია და სამხრეთ აფრიკა. საფრანგეთი კი რამდენიმე რეგიონით (ბერჟერაკი, პროვანსი, რონა) ცალკე იქნება წარმოდგენილი.
© ღვინის კლუბი/Weekend