ფრანგული სამზარეულო მსოფლიოს არამატერიალურ კულტურათა მემკვიდრეობის სიაში შევიდა. ამგვარი გადაწყვეტილება სულ ახლახან ნაირობში, იუნესკოს სპეციალური კომიტეტის სესიაზე მიიღეს. ეს ვერდიქტი უპრეცედენტოა. არამატერიალური კულტურული მემკვიდრეობის ჩამონათვალში აქამდე ცალკე აღებული ერის გასტრონომიული ხელოვნება არ შედიოდა.
ახლა საფრანგეთის მთავრობას განზრახული აქვს გარკვეული ზომების მიღება, რათა მდიდარი გასტრონომიული მემკვიდრეობა შეინარჩუნოს. საფრანგეთის კულტურის მინისტრის ფრედერიკ მიტერანისა და სოფლის მეურნეობის უწყების ხელმძღვანელის ბრუნო ლე მერის ერთობლივ განცხადებაში ნათქვამია, რომ უახლოეს მომავალში საფრანგეთის მთავრობა დაიწყებს ახალი პროგრამების განხორციელებას, რომელთა მიზანია ხელი შეუწყოს ადგილობრივი სამზარეულოს ტრადიციების აღორძინებას, ახალგაზრდა თაობის განათლებას ეროვნული კერძების მომზადების კულტურის მხრივ, გასტრონომიული ტურიზმის განვითარებას ქვეყნის შიგნით და ფრანგული სამზარეულოს პოპულარიზაციას საერთაშორისო არენაზე.
© ღვინის კლუბი/“Weekend“