ჟენევაში, აუქციონის სახლმა Christie’s ღვინის ვაჭრობა გამართა. აუქციონის ტოპ ლოტად იქცა Chateau Cheval-Blanc-ის ღვინის ექვსლიტრიანი ბოთლი. ანონიმურმა კოლექციონერმა მასში 304 375 ამერიკული დოლარი გადაიხადა. ვაჭრობის დაწყებამდე 1947 წლის მოსავლის ეს ღვინო 150-250 ათას დოლარად იყო შეფასებული.
Christie’s აუქციონის სახლი აცხადებს, რომ ეს გახლავთ რეკორდული თანხა, რომელიც ოდესმე ბოთლ ღვინოში აუქციონზე გადაუხდიათ. აქამდე რეკორდი 1869 წლის Chateau Lafite-ს ეკუთვნოდა, რომლის სამი ბოთლიც ოქტომბერში ჰონკონგში Sotheby’s აუქციონზე გაიყიდა - თითოეული 230 ათას დოლარად.
აუქციონის ორგანიზატორები ასევე აცხადებენ, რომ გაყიდული ლოტი, შესაძლოა, მსოფლიოში "იმპერიალის" ფორმატით (ანუ ექვსლიტრიან ჭურჭელში) დაფასოებული ერთადერთი ბორდოა.
© ღვინის კლუბი/“Weekend“