საქვეყნოდ ცნობილი ბრიტანელი მზარეული, ტელეგადაცემების წამყვანი, წიგნების ავტორი და კულინარიის გურუდ აღიარებული ჯეიმი ოლივერი სულ მალე, ნოემბერში, თავის პირველ რესტორანს გახსნის დუბაიში. რესტორანი დუბაის სავაჭრო ცენტრ Dubai Festival City–ში განთავსდება და 290 ადამიანზე იქნება გათვლილი. ეს ჯეიმი ოლივერის პირველი რესტორანი იქნება ბრიტანეთის ფარგლებს გარეთ, სამშობლოში კი იგი უკვე თხუთმეტი რესტორნის მფლობელია. დუბაი დიდი ხანია, კულინარიის მეტრების ყურადღების ცენტრშია მოქცეული. აქ საკუთარი რესტორნები აქვთ გახსნილი მსოფლიოში აღიარებულ შეფ-მზარეულებს: გორდონ რამსეის, ჰარი როდესს და მარკო პიერ უაიტს.