ბოლო წლებში ღვინის ინდუსტრიის წარმომადგენლები სულ უფრო ხშირად ამჩნევენ ცვლილებებს მომხმარებლებში. ხშირად ისმის მოსაზრებაც, რომ ახალ თაობას ღვინო ნაკლებად აინტერესებს და კოქტეილებს ან სხვა მსუბუქ სასმელებს ამჯობინებს. ამ საკითხზე FB გვერდზე ჩვენს მკითხველსაც ვკითხეთ აზრი, საინტერესოა, რეალურად რამდენად იცვლება ახალგაზრდების დამოკიდებულებას ღვინის მიმართ?
ზურაბ თოფურიძე აღნიშნავს, რომ ახალგაზრდებს ნამდვილად იზიდავთ კარგი ღვინო, განსაკუთრებით მაშინ, როცა ამის შესაძლებლობა ეძლევათ. აქ მნიშვნელოვანია გარემო და წვდომა – კარგი ღვინის აღმოჩენა ხშირად ინიციაციური მომენტია მათთვის, ვინც მანამდე ღვინოს არ ეტანებოდა: “კარგ ღვინოს ნამდვილად სვამს ახალი თაობა, მით უმეტეს, თუ კარგი ღვინო იაფად ნახეს ან საჩუქარია. ასეთ სიტუაციაში სინჯავენ, მოსწონთ კარგი ღვინო და სვამენ ისეთებიც კი, ვინც ღვინისკენ საერთოდაც არ იყურებოდა. ეს კი ძალიან სასიხარულოა”
ირმა მერებაშვილი საუბრობს იმაზე, რომ ბუნებრივ ღვინოებს ბევრად მეტი მოწონება აქვს ახალგაზრდებში. როგორც ჩანს, ახალგაზრდებისთვის მნიშვნელოვანია ავთენტურობა, ეკოლოგიური გარემო და გემო, რომელიც ინდუსტრიალურ ღვინოებთან შედარებით განსხვავებულია: “ჩემი უმცროსი მეგობრები სიამოვნებით სინჯავენ ჩვენს მარანში ბუნებრივ ღვინოებს. ბოლო დროს სულ აღნიშნავენ, რომ, რაც ბუნებრივი ღვინოების გემო გაიგეს, სხვა ღვინოებს აღარ ცნობენ!”
გურამ მაისურაძე კი საკითხს ისტორიულ ჭრილში განიხილავს: ახალგაზრდებისთვის ღვინო არასდროს ყოფილა მთავარი ალკოჰოლური სასმელი. თუმცა, მისი დაკვირვებით, დღეს საქართველოში ღვინო გაცილებით მეტ ინტერესს იწვევს ახალგაზრდა მომხმარებელში, რაც ასევე შეიძლება მიანიშნებდეს კულტურული პარადიგმის ცვლილებაზე: “ახალგაზრდა თაობაში ღვინო არასდროს ყოფილა ყველაზე მოთხოვნადი ალკოჰოლური სასმელი. ლუდი და მსგავსი ტიპის სასმელები, რა თქმა უნდა, უფრო მარტივი და ხელმისაწვდომი იყო ყოველთვის. ღვინის სმას ასაკის მატებასთან ერთად უფრო უმატებდნენ ყველა თაობის წარმომადგენლები, თუმცა მე მაინც ვფიქრობ, რომ საქართველოში ღვინო ახალგაზრდებისთვის ისეთი მოთხოვნადი, როგორიც ახლაა, არასდროს ყოფილა “
ვლადიმერ ნაჭყებია გლობალურ ტრენდებზე ამახვილებს ყურადღებას – ახალგაზრდებისთვის ჯანმრთელობა და ზომიერება სულ უფრო მნიშვნელოვანია. შედეგად, ღვინის სმისას მთავარი ხდება ხარისხი და იშვიათობა. იაფფასიანი ინდუსტრიული ღვინოებს ადგილი აღარ რჩება, თუმცა ღირებულ, იშვიათ და განსხვავებულ პროდუქტებზე ინტერესი იზრდება.
ლაშა გურული კი საუბრობს ღვინის კულტურის სწავლაზე – იდეაზე, რომ ახალგაზრდობამ ჯერ ახლა უნდა გაითავისოს ღვინის მოხმარების ტრადიცია, რაც გულისხმობს არა რაოდენობას, არამედ გემოს, დიალოგს და გამოცდილებას: "ღვინის ,,სწორად'' მირთმევა ახალგაზრდობამ ახლა უნდა ისწავლოს. თორემ საბჭოთა თაობია უმრავლესობას ვერ გააგებინებ, რატომ არ უნდა სვას ლიტრიანი სასმისებით ღვინო, და რა გემურ მახასიათებლებს უნდა აფასებდეს ღვინოში. 1 ბოთლი ღვინო, ხემსი, 2-3 ადამიანი, და საუბარი 1 საათით- სულ ესაა ლოგიკა, რითაც ღვინის ჭეშმარიტი სიყვარული იწყება."
ბოლო წლებში გლობალურად ღვინის მოხმარება იკლებს, განსაკუთრებით ახალგაზრდებში. New york post-ის მიხედვით ამის ერთ-ერთი მიზეზი ჯანმრთელობის მიმართ მზარდი ყურადღებაა: ახალგაზრდები უფრო ხშირად ირჩევენ დაბალალკოჰოლიან ან უალკოჰოლო სასმელებს, ახალგაზრდები ღვინოს აღიქვამენ, როგორც ძვირადღირებულ და რთულად გასაგებ პროდუქტს. გარდა ამისა, ალტერნატიული სასმელების პოპულარობაც მნიშვნელოვანია: კოქტეილები, ლუდი და სხვა სასმელები ხშირად უფრო მიმზიდველია ახალგაზრდებისთვის.
საქართველოში, მიუხედავად გლობალური ტენდენციებისა, ახალგაზრდებში ღვინისადმი ინტერესი იზრდება. 2022 წელს გამოქვეყნებულ კვლევაში Analyze of the wine consumer behavior in Georgia (ResearchGate) ჩანს, რომ 18-24 წლის ახალგაზრდები საქართველოში ღვინოს აქტიურად მოიხმარენ. განსაკუთრებით პოპულარულია თეთრი ღვინო, რაც ასევე ადასტურებს, რომ ახალგაზრდების გემოვნება განსხვავებულია. ახალ თაობას არ აინტერესებს სტატუსი – მათ აინტერესებთ გამოცდილება.
© ღვინის კლუბი/vinoge.com