The Wine Edit არის ჰოლანდიური ონლაინ პლატფორმა, რომელსაც ღვინის ექსპერტი ვიკი ჰემპტონი მართავს. ის რეგულარულად აქვეყნებს ღვინის მიმოხილვებს, ტენდენციებსა და რეკომენდაციებს, რომლებიც განსაკუთრებით ეხება ნიდერლანდებში ხელმისაწვდომ ღვინოებს. ორი დღის წინ მან სტატია ქარვისფერი ღვინოების შესახებ გამოაქვეყნა, რეკომენდაციებში კი ქართული ღვინოც არის, რომელსაც მკითხველს ურჩევს.
ავტორი განსაკუთრებულ ყურადღებას ამახვილებს მეფის დღეზე, რომელიც ნიდერლანდებში 26 აპრილს აღინიშნება და ტრადიციულად ლუდთან – განსაკუთრებით კი ჰაინეკენთან – ასოცირდება. თუმცა ჰემპტონი მკითხველს სთავაზობს ალტერნატივას: „რატომ არ შეცვლიდით ჰაინეკენს უფრო საინტერესო და უნიკალური სასმლით – ქარვისფერი ღვინით?“ – კითხულობს ჰემპტონი: "მიუხედავად იმისა, რომ ნარინჯისფერი ტანსაცმელი იშვიათად უხდება ვინმეს, „ქარვისფერი ღვინო როგორც კატეგორია, სულ უფრო პოპულარული ხდება ნიდერლანდებში თეთრი, წითელი და ვარდისფერი ღვინოების გვერდით.“
ავტორი თავდაპირველად მკითხველს განუმარტავს, რომ ქარვისფერ ღვინოს თეთრი ვაზის ჯიშებისგან წითელი ღვინის მსგავსი მეთოდით ამზადებენ: "ეს ნიშნავს, რომ ღვინო თეთრი ყურძნისგან მზადდება, თუმცა მისი ფერმენტაციისას სითხე რამდენიმე დღე ან კვირა დურდოზე რჩება. სწორედ ეს აძლევს ქარვისფერ ღვინოს როგორც ფერს, ასევე ტანინებსა და უფრო მკვეთრ სტრუქტურას, რომელიც კლასიკურ თეთრ ღვინოებში იშვიათად გვხვდება."
ჰემპტონი ასევე ხაზს უსვამს იმას, თუ როგორი შეიძლება იყოს ქარვისფერი ღვინო. „მიუხედავად გავრცელებული მცდარი შეხედულებისა, ქარვისფერი ღვინო ნატურალურ ღვინოს არ ნიშნავს.“ შესაძლოა, იგი დაბალჩარევითი მეთოდით იყოს დამზადებული, მაგრამ არსებობს ისეთი ქარვისფერი ღვინოებიც, სადაც გოგირდსაც ამატებენ და ფილტრაციასაც გადის ღვინო. ამასთანავე, მიუხედავად იმისა, რომ ბოლო წლებში ქარვისფერი ღვინო ტრენდად იქცა, ეს ნამდვილად არ არის ახალი აღმოჩენა: „ქართველები უკვე ათასწლეულებია ქარვისფერ ღვინოს აწარმოებენ, ხოლო სლოვენიასა და ჩრდილოეთ იტალიაში ეს ტრადიცია საუკუნეებს ითვლის.“
ავტორი აღნიშნავს, რომ ქარვისფერი ღვინო ერთ-ერთი ყველაზე მრავალფუნქციური სასმელია საკვებთან შეხამების მხრივ: „ისევე უხდება შემწვარ ქათამს, როგორც ცხარე ჰოლანდიურ და ინდონეზიურ კერძებს. ქარვისფერი ღვინის ტექსტურა და კომპლექსურობა მას იდეალურ პარტნიორად აქცევს როგორც მსუბუქი, ისე მძიმე კერძებისთვის."
ავტორი ასევე განიხილავს ფასს და ამბობს, რომ ქარვისფერი ღვინო, როგორც წესი, უფრო ძვირია, ვიდრე ჩვეულებრივი თეთრი ღვინო. ამის მიზეზი მისი ჯერ კიდევ ნიშური კატეგორიის სტატუსი და დაბალჩარევითი მეთოდების გამოყენებაა, რაც წარმოების ხარჯებს ზრდის.
ვიკი ჰემპტონი მკითხველს სამ განსაკუთრებულ ღვინოს სთავაზობს:
Winzer Krems, Orange Grüner Veltliner, ავსტრია, 2023 (€11.29) – შედარებით მსუბუქი ქარვისფერი ღვინო, რომელიც განსაკუთრებით უხდება ცხარე კერძებს. აქვს მანდარინის, გარგრის, თეთრი ატმისა და მწვანე ქლიავის არომატები.
Wijngoed Wolf, Oranje Boven, ნიდერლანდები, 2022 (€17.95) – ჰოლანდიური წარმოების, ბიოდინამიური ღვინო, რომელიც დამზადებულია სტაბილურ ჰიბრიდულ ჯიშებზე (Souvignier Gris და Sauvignac). იდეალურია ყველთან და მსუბუქ აპერიტივებთან.
Koncho Rkatsiteli Qvevri, Amber Dry, საქართველო, 2020 (€17.95) – ტრადიციული ქართული ქვევრის ღვინო, რომელიც Rkatsiteli-ის ჯიშისგან მზადდება. გამოირჩევა მურაბისა და სანელებლების არომატებით და შესანიშნავია აღმოსავლურ კერძებთან.
სტატიის ბოლოს, ვიკი ჰემპტონი მკითხველს ურჩევს, რომ მეფის დღეს კიდევ ერთხელ დაფიქრდნენ სასმლის არჩევანზე და კლასიკური ლუდის ნაცვლად ქარვისფერი ღვინო დააგემოვნონ. "თუ ქარვისფერ ღვინოს გასინჯავთ, ის თქვენთვის საუკეთესო ღვინის კატეგორია გახდება"
მათთვის, ვისაც ქარვისფერი ღვინის შესახებ მეტი სურს გაიგოს, ჰემპტონს აქვს ორნაწილიანი სერია The Wine Edit-ის ბლოგზე, ხოლო მისი რეკომენდაციებისა და ღვინის სამყაროს უახლესი ტრენდების გასაცნობად, შეგიძლიათ მიჰყვეთ @TrufflesandTannins ინსტაგრამზე.
© ღვინის კლუბი/vinoge.com