ღვინის გასინჯვას თავისი კულტურა და ტექნიკა აქვს, რომელიც მხოლოდ სასმლის დალევას არ გულისხმობს. იმისათვის, რომ ღვინის ნამდვილი არომატი, სტრუქტურა და გემო სრულად შეიგრძნოთ, არსებობს გარკვეული წესები, რომლებსაც პროფესიონალი სომელიეები და ღვინის მოყვარულები იცავენ. თუმცა, ხშირად ზოგიერთი გავრცელებული შეცდომა ამ გამოცდილებას ართულებს და ღვინის რეალური პოტენციალის აღქმას აფერხებს.
აი, 7 ველაზე გავრცელებული შეცდომა, რომელსაც ღვინის დაჭაშნიკებისას უშვებენ და რჩევები, რომლებიც დაგეხმარებათ ღვინო სრულფასოვნად შეიგრძნოთ.
1️) არასწორი ჭიქის გამოყენება
ჭიქას დიდი მნიშვნელობა აქვს ღვინის გემოს აღქმაში. მაგალითად, ფართო პირის მქონე ჭიქა უფრო მეტად ააქტიურებს არომატებს და საუკეთესოა წითელი ღვინისთვის, მაშინ როცა თეთრი ღვინოებს ვიწრო ჭიქა უკეთ ერგება, რათა არომატები და სიგრილე შეინარჩუნოს. შუშის სისქეც მნიშვნელოვანია – თხელი, გამჭვირვალე ჭიქა საშუალებას გვაძლევს ღვინო სწორად შევაფასოთ ვიზუალურად.
2️) ღვინის ზედმეტად ცივ ან თბილ ტემპერატურაზე მირთმევა
ტემპერატურას შეუძლია ღვინის გემო სრულად შეცვალოს. მაგალითად, ძალიან ცივი ღვინო თავის არომატებს „მალავს“ და არ გაძლევს საშუალებას ღვინის გაცნობის, ხოლო ზედმეტად თბილ ღვინოში ალკოჰოლის შემცველობა უფრო მკვეთრად იგრძნობა, რაც სასმლის არომატებსა და ბალანსს არღვევს. ასეთ შემთხვევაში ღვინო შეიძლება მძიმე და ნაკლებად ჰარმონიული მოგეჩვენოთ, ხოლო მისი ნაზი ნოტები დაჩრდილოს ალკოჰოლის სიძლიერემ. იდეალური ტემპერატურა წითელი ღვინისთვის 14-18°C-ია, თეთრისთვის კი – 8-12°C. სადესერტო და ცქრიალა ღვინოებს, როგორც წესი, ცივ ტემპერატურაზე მიირთმევენ, რათა მათი სიტკობო და მჟავიანობა კარგად დაბალანსდეს და მთლიანობაში სასიამოვნო გამოცდილება შექმნას. იდეალური ტემპერატურა სადესერტო ღვინოებისთვის არის 6-8°C.
3️) ღვინის ჭიქის არასწორი დაჭერა
ბევრი ადამიანი ჭიქას ზედა ნაწილით, ანუ თასით იმორჩილებს, თუმცა ასე ღვინო თბება და მისი არომატი იცვლება. ჭიქა ღეროზე (სტემზე) უნდა დაიჭიროთ, რაც ხელს შეუწყობს სასმლის ოპტიმალურ ტემპერატურაზე შენარჩუნებას და ღვინის სუფთა ვიზუალურ შეფასებასაც.
4️) არომატების გამოტოვება – ღვინის დაუყოვნებლივ გასინჯვა
დაჭაშნიკების ერთ-ერთი ყველაზე დიდი შეცდომაა ღვინის დაუყოვნებლივ გასინჯვა არომატების აღქმის გარეშე. ღვინო ჯერ უნდა გადაანიავოთ, დაატრიალოთ ჭიქაში, რათა ჟანგბადთან კონტაქტში შევიდეს და მისი ნამდვილი სურნელოვანი პროფილი გაიხსნას. შემდეგ კი ცხვირთან მიიტანეთ და სცადეთ ამოიცნოთ ძირითადი ნოტები – ხილი, ყვავილები, მუხა თუ სანელებლები.
5) ღვინის მხოლოდ ერთი ყლუპით შეფასება
პირველი ყლუპი ყოველთვის საუკეთესო შთაბეჭდილებას ვერ დატოვებს, რადგან პირში შესაძლოა სხვა გემოები იყოს დარჩენილი. კარგია, თუ ღვინოს მეორე ან მესამე ყლუპითაც შეაფასებთ, რათა ენა შეეგუოს და მისი ნამდვილი ხასიათი შეიგრძნოთ. ზოგიერთი ღვინო დროთა განმავლობაში იცვლება კიდეც და უფრო საინტერესო ხდება, თუმცა, ცხადია, ბრმა დეგუსტაციებზე ექსპერტები ღვინის რამდენჯერმე გასინჯვას ვერ ასწრებენ- მათთვის ღვინის გემური თვისებები პირველივე ყლუპზე გასაგები ხდება.
6) ღვინის ერთდროულად ძალიან ბევრი სახეობის გასინჯვა
თუ ერთ საღამოს ძალიან ბევრი განსხვავებული ღვინო გასინჯეთ, თქვენი გემოს რეცეპტორები გადაღიღლება და საბოლოოდ შეიძლება ვეღარ შეიგრძნოთ თითოეული ღვინის ნამდვილი გემოს განსხვავებები. სასურველია, დეგუსტაცია ეტაპობრივად და სწორი თანმიმდევრობით ჩაატაროთ – მსუბუქი თეთრი ღვინოებიდან უფრო მძიმე წითლებამდე
7) ღვინის სურნელის შეფასება სუნამოს ან სხვა მძაფრი არომატების გამოყენებისას
თუ ღვინის დაჭაშნიკებისას სუნამო გაქვთ მიპკურებული ან ცოტა ხნის წინ კრემით, ლოსიონით ან სხვა მძაფრი არომატის მქონე საშუალებებით ისარგებლეთ, ეს ღვინის არომატების აღქმას ართულებს. პროფესიონალი დეგუსტატორები ამ მიზეზით ხშირად თავს არიდებენ სუნამოებს და არომატულ კოსმეტიკურ საშუალებებს.
© ღვინის კლუბი/vinoge.com