საქართველოსთვის ღვინო მხოლოდ ეკონომიკური პროდუქტი არ არის, ის ქვეყნის კულტურული იდენტობისა და ტრადიციების უმნიშვნელოვანესი ნაწილიცაა. ბოლო წლების განმავლობაში, ქართული ღვინის სექტორი მნიშვნელოვნად განვითარდა და ნელ-ნელა საერთაშორისო ბაზრებზე წარმატებით მკვიდრდება. ამ პროცესში განსაკუთრებული როლი ეკუთვნის საერთაშორისო ორგანიზაციების მიერ ორგანიზებულ ინიციატივებს, რომლებიც ქვეყნის ვენახებისა და მეღვინეობის განვითარებისკენ არის მიმართული.
2024 წლის ნოემბრის ბოლოს, გაეროს სურსათისა და სოფლის მეურნეობის ორგანიზაციის (FAO) ინიციატივით და ევროკავშირისა და შვედეთის მხარდაჭერით, ENPARD IV პროგრამის ფარგლებში, საქართველოში ვაზის ზამთრის გასხვლასთან დაკავშირებით ტრენინგები ჩატარდა. აღნიშნული ტრენინგები მოიცავდა როგორც პრაქტიკულ, ისე თეორიულ ნაწილებს და მიზნად ისახავდა საქართველოს ღვინის სექტორის კონკურენტუნარიანობის ამაღლებას, როგორც შიდა, ისე საერთაშორისო დონეზე.
ტრენინგების სერია FAO-ს საერთაშორისო ექსპერტმა, ხულიო პრიეტო დიასმა, წარუდგინა. მასში მონაწილეობდა ვიტიკულტურის პროფესიონალთა მცირე ჯგუფი, აგრეთვე სტუდენტები და ღვინის მწარმოებლები, რომელთაც სურდათ ვაზის გასხვლასთან დაკავშირებული თანამედროვე მეთოდების უფრო დეტალურად გაცნობა. ტრენინგი ჩატარდა Training of Trainers ფორმატით, რაც მიღებული ცოდნის ფართო აუდიტორიაზე გავრცელებას უზრუნველყოფს.
აღსანიშნავია, რომ ტრენინგების შედეგად მონაწილეებმა შეისწავლეს ვაზის გასხვლისა და ფორმირების თანამედროვე მეთოდები, რაც მნიშვნელოვან გავლენას მოახდენს ვენახების ჯანმრთელობაზე და მოსავლის ხარისხზე. ეს ცოდნა არამარტო აძლიერებს ადგილობრივ წარმოებას, არამედ ხელს უწყობს ქართული ღვინის საერთაშორისო კონკურენტუნარიანობას.
პროექტის ფარგლებში, FAO-მ ლექციებიც გამართა, რომელშიც მონაწილეობდა საქართველოს ტექნიკური უნივერსიტეტისა და კავკასიის საერთაშორისო უნივერსიტეტის 75 სტუდენტი. ამ ინიციატივამ ხელი შეუწყო მომავალი აგრონომების პროფესიული უნარ-ჩვევების გაძლიერებას, რაც მნიშვნელოვანია ქვეყნის ღვინის სექტორის მდგრადი განვითარებისათვის.
ტრენინგები დასრულდა pruning-ის ფესტივალით, სადაც 80-მდე პროფესიონალს საშუალება მიეცა, პრაქტიკული საველე სამუშაოები შეესრულებინათ. ღონისძიება გაიმართა Crush 525 ვენახში, მცხეთა-მთიანეთში: "მსგავსი ინიციატივები კიდევ ერთხელ უსვამს ხაზს ქართული ღვინის უნიკალურობას და მის ეკონომიკურ პოტენციალს. FAO და ENPARD-ის მხარდაჭერა განაგრძობს საქართველოს ღვინის სექტორის განვითარების ხელშეწყობას, რაც თავის მხრივ ქვეყნის კულტურული იდენტობის გლობალურ პოპულარიზაციას ემსახურება." - ვკითხულობთ გაეროს სურსათისა და სოფლის მეურნეობის ორგანიზაციის ოფიციალურ ვებგვერდზე.