ინგლისში 2024 წლის რთველი მძიმე დანაკარგებით გამოირჩეოდა, რაც დიდწილად განპირობებული იყო ნალექიანი ამინდებითა და მცენარეთა სოკოვანი დაავადებით, ჭრაქით, (Downy mildew), რომელმაც ვენახებზე ძალიან რთულად იმოქმედა. DEFRA-ს მონაცემებით, ინგლისში 2024 წელი ყველაზე რთული მოსავლის წელი აღმოჩნდა მთელი ისტორიის განმავლობაში. მევენახეების უმეტესობამ რთველი 2 კვირის წინ დაიწყო, თუმცა, სავარაუდოდ, მოსავალი 70 პროცენტამდე შემცირდება.
Hampshire-ში მდგომარეობა განსაკუთრებით მძიმეა. Vranken Pommery-ის ღვინის მარნის მეღვინე კლემენ პიერლოტი აცხადებს, რომ მოსავალი ნორმაზე ორჯერ ნაკლებია, რაც გასული წლის რეკორდული მოსავლის მესამედს უდრის: „თუმცა, მიუხედავად გამოწვევებისა, ხარისხი მაღალია და გუნდის თავდადება განსაკუთრებულ შედეგს მოგვცემს“, აღნიშნა მან.
მევენახეებს განსაკუთრებული სირთულეები შეუქმნა ჭრაქმა, რომელიც მაღალი ტენიანობის გამო გავრცელდა. Hampshire-სა და Sussex-ის ვენახებში ნორმალური რაოდენობის მოსავლის მიღება ვერ მოხერხდა, განსაკუთრებით დაზარალდა Pinot Meunier-ის ყურძენი. Exton Park-ის დირექტორი ფრედ ლენგდეილი აღნიშნავს, რომ რთველის ხარისხი კარგია, თუმცა რაოდენობა 20 პროცენტით შემცირდა.
East Sussex-ის Ridgeview Wine Estate-ი წერს, რომ რთველი ცუდი იყო, თუმცა ხარისხიანი მოსავლის მიღება მაინც შესაძლებელი გახდა, რადგან მათთან ვაზის დივერსიფიკაცია ხდება. მოთხოვნები მკაცრად დაცული იყო, ამიტომ საბოლოოდ მცირე რაოდენობის, თუმცა მაღალი ხარისხის ყურძენი მიიღეს.
Decanter-ის სტატიაში ხაზგასმულია, რომ კლიმატის ცვლილება დიდი გამოწვევაა ინგლისური ცქრიალა ღვინოების წარმოებისთვის. სამხრეთ ინგლისის მიკროკლიმატი გარკვეულწილად ჰგავს შამპანის რეგიონს 1960-70-იან წლებში, თუმცა, ექსპერტები აღნიშნავენ, რომ კლიმატის ცვლილებასთან გამკლავებისთვის დამატებითი სიმტკიცე და მდგრადობა იქნება საჭირო. კლიმატის ცვლილების კვლევითი ცენტრის ანალიტიკოსი, ტომ ლანკასტერი, აცხადებს: „წლევანდელი რთველი ნამდვილად იყო სირთულეებით სავსე და ამის მიზეზი კლიმატის ცვლილებაა. კლიმატის ცვლილება დიდ საფრთხეს უქმნის ბრიტანეთის სურსათის უსაფრთხოებას, და ეს ეფექტები უფრო მეტად გართულდება, თუ სათბურების გამონაბოლქვი დროულად არ შემცირდება.“
აგრეთვე, ვაზის მოვლის სპეციფიკური მეთოდებიც შესთავაზეს მწარმოებლებმა მეღვინეებს კლიმატის ცვლილებასთან გამკლავებისთვის. რიჯვიუს მეღვინეობის ხელმძღვანელი, მეტ სტრაგნელი, აღნიშნავს: „ჩვენთვის გადამწყვეტია, რომ კლიმატის ცვლილებასთან გასამკლავებლად ვაზის მოვლის მდგრადი სისტემები შევიმუშაოთ. ვცდილობთ, უფრო დეტალურად გავეცნოთ ნიადაგის თავისებურებებს და ასევე გადავხედოთ გასხვლის მეთოდებს. ამ გზით, გვჯერა, რომ ჯანმრთელი ვაზი უკეთ გაუმკლავდება კლიმატის ცვლილებით გამოწვეულ სირთულეებს და მომავალში უფრო მეტად შევძლებთ კარგი მოსავლის მიღებას დანაკარგების გარეშე.“
სეზონის ბოლოს, 2024 წლის რთველის მცირე რაოდენობის მიღებამ ბევრი მევენახე მძიმე მდგომარეობაში დატოვა, თუმცა, როგორც სტატიაში მარტინ გრინი აღნიშნავს, მოსავლის უმეტესობა ჯანმრთელი და ხარისხიანია, რაც აღებული მოსავლის წარმატებით წარმოების საშუალებას იძლევა. ამავდროულად, იმედოვნებენ, რომ გასული წლის ღვინოებიც მიმდინარე მოთხოვნის დაკმაყოფილებას შეძლებს.
გასულ წელს, ინგლისში რთველმა რეკორდული მაჩვენებლებით ჩაიარა. 21,6 მილიონი ბოთლი, იდეალური ამინდები, თუმცა წელს ქვეყნისთვის კლიმატურმა ცვლილებებმა სხვა შედეგი მოიტანა. სტატიას გაეცნობით Decanter.com-ზე.
© ღვინის კლუბი/vinoge.com