სტატიის ავტორი გილ მარტინი, რომელიც ცნობილი მოგზაური, მწერალი და Fleet Street-ის ჟურნალისტია, აღწერს ლონდონში გამართული ქართული კულინარიული ღონისძიების შთაბეჭდილებებს. სტატია გამოქვეყნდა ვებგვერდზე "Belle About Town" და იგი მკითხველს ქართული სამზარეულოსა და ღვინის ტრადიციებს აცნობს.
პირველივე აბზაცში ავტორი გვამცნობს, რომ ლონდონში, ივლისის დასასრულს ქართული კულინარია და ღვინო დიდი ყურადღების ცენტრში მოექცა, როდესაც ქართველმა შეფ-მზარეულებმა და სომელიეებმა უნიკალური ქართული პროდუქტები და კერძები წარუდგინეს ადგილობრივებს.
გილი პირველ რიგში აღწერს თავის გამოცდილებას რესტორან "Little Georgia"-ში, რომელიც მდებარეობს ისლინგტონში, Angel-ის მეტროსადგურის მახლობლად. რესტორანი, რომელიც 15 წელია ფუნქციონირებს, მყუდრო და მშვიდ გარემოს სთავაზობს სტუმრებს, სადაც დეკორაციებად საბჭოთა პერიოდის პოსტერები და უცნაური ნივთები შეგხვდებათ. აქ ავტორმა პირველად დააგემოვნა ქართული კერძები, რომლებიც მისი მოსაზრებით, ერთ-ერთი ყველაზე კალორიული და გემრიელია, რაც კი როდისმე უგემია.
ავტორი დეტალურად აღწერს მენიუს: სალათების, ყველისა და ნაღებით მდიდარ კერძებს. მან სცადა ქართული პურის სხვადასხვა სახეობა, რომლებიც იდეურად ძალიან უხდებოდა ქართულ ინტენსიურ და შედარებით მაღალმჟავიან ღვინოებს. გარდა ამისა, ავტორი აღფრთოვანებული იყო ტკბილეულით, განსაკუთრებით კი ტრადიციული ქართული დესერტებით, როგორიცაა ფელამუში, კერძებს შორის კი ძალიან მოეწონა ლობიო და შქმერული.
სტატიის ბოლოს ავტორი აღნიშნავს, რომ მან გამოტოვა ზოგიერთი ქართული კერძის, მათ შორის ხინკლის და სხვა კერძების დაგემოვნება, რაც მისთვის კარგი მიზეზი კიდევ ერთხელ უკან დასაბრუნებლად.
მარტინი ასევე გვამცნობს, რომ ქართული ტურიზმის ეროვნული ადმინისტრაცია მონაწილეობდა National Geographic Traveller-ის კვების ფესტივალში ლონდონში, სადაც მოწვეული შეფ-მზარეულები და სომელიეები ჩართული იყვნენ მასტერკლასებისა და დეგუსტაციების პროცესში, რომლებიც შეეხებოდა ქართულ კულინარიასა და ვიტიკულტურას. ბევრმა სტუმარმა აღმოაჩინა, რომ საქართველო არის ევროპისა და აზიის გზაჯვარედინი, სადაც ღვინის წარმოების ტრადიციას 8,000 წელი აქვს.
სტატია სრულდება ქართველი მეღვინე ირაკლი ჩოლობარგიას ღვინის დეგუსტაციით, სადაც ავტორმა და სხვა სტუმრებმა ქართული ღვინო და ჭაჭა დააჭაშნიკეს. სტატიას გაეცნობით belle about town-ზე.
© ღვინის კლუბი/vinoge.com